Governor-in Chite lui a ngaihven

Governor Hari Babu Kambhampati chuan Maan Ki Baat bawhzuiin, nimin khan Raj Bhavan-ah Save Chite Lui Coordination Committee (SCLCC) hruaitute a kâwm a, Chite lui humhalhna atana hmalakna leh Save Chite Lui Action Plan Phase-II hmachhawpte a sawipui.

Governor chuan, Chite luia bawlhhlawh lut tam ber - plastic bawlhhlawh tihtawp a pawimawh thu sawiin, "Mipuiah awareness campaign bakah lui dungah a theihna hmun apiangah thing phun tam tura hmalak ni se, a ṭul a nih chuan garbage net hman a, hunbi neia hnatlan ni se, sikul zirlaiah environment chungchang inzirtirna uar lehzualin kalpui ni se," a ti.

Inkawmnaa tarlan danin, Chite luia bawlhhlawh lut zingah 80% vel chu plastic bawlhhlawh a ni a, plastic waste chhar khawm fo ni mah se, thehthangna tur leh thehthang dan turah a tifaitute'n harsatna an tâwk ṭhin a ni.

Ministry of Environ­ment, Forest & Climate Change dan siam, Plastic Waste Management Rules, 2016 chuan plastic aṭanga thil siam hman hnute chu thehthang mai loin, ṭangkai zawka hmanna dap turin a ti a ni.