Kolasib district chhungah kuminah TB vei mi 100 hmu chhuak tawh

Kolasib District TB Forum chu nimin khan bawrhsap John LT Sanga kaihhruaiin an ṭhukhawm a, India rama ngawr (TB) ûm bo a nih theihna tura beihpui thlakna ‘TB MUKT Bharat 2025’ tihpuitlinna dan tur an sawiho. Kolasib district-ah kum 2021 chhungin TB vei mi 68 leh kuminah June thla thlengin mi 100 hmuh chhuah a ni.

John LT Sanga chuan, TB chu natna lang chhuak mai lo, hmuh chhuah har tak leh enkawl hautak tak a nih avangin a veite dap chhuah hna ngawrh taka kalpui a pawimawh thu sawiin, "TB natna endik kawnga hmanraw pawimawh tak Central TB Division aṭanga dawn Digital X-Ray Machine pawh hman theih tura bun fel vat a nih theih nan a ṭul ang angte bawhzui a ni," a ti a; TB Patients Support Scheme hnuaiah mi 11-in donor ni tura an inziak lut chu lawmawm a tih thu a sawi.

Dr RK Lalthlamuana tarlan danin, kum 2021 khan Kolasib district-ah TB vei mi 68 hmuh chhuah a ni a, chu'ng zinga pathum chu multi-drug resistant (MDR) TB vei an ni. Kuminah June 2022 thlengin TB vei mi 100 hmuh chhuah a ni a, an zinga panga chu MDR TB vei an ni.

Piramal Swasthya nen thawhhona hnuaiah Kolasib district khaw 41-a TB vei dap chhuah hna kalpuinaah mi 67,762 endik an ni a, chu'ng zinga TB vei rinhlelhawma ngaih mi 1,104 endik aṭangin TB vei mi 16 hmuh chhuah a ni. CHC leh PHC kaltlangin kuminah sample 29,666 endik aṭangin TB vei mi pali hmuh a ni bawk.

TB veite'n enkawlna an lak chhungin thla tin Rs 500 leh an dam hnuah Tribal Incentive Rs 750 an dawng thei a, inenkawlna kalpui chhungin treatment support Rs 1,000 - 5,000 an dawng thei bawk a ni.