Kumina Covid positivity rate a san ber ni

June 30, Ningani khan Mizoramah swab sample 127 endik aṭangin Covid-19 vei mi 58 hmuh chhuah a ni a, za zelah 45.67% a tling a, kumina positivity rate a sàn ber ṭum leh hripui len hnua a san ber dawttu a ni. Nimin khan hripui vei dam tawh mi 40 chhuahtir an ni a, Covid-19 vanga thi an awm lo.

Ningania hripui vei hmuh thar mi 58-te chu mipa 19 leh hmeichhia 39 an ni a, Rapid Antigen Test hmanga hmuh chhuah vek an ni. Mi 58 zinga 33 chu Aizawl district-a mite niin, mi 30 chu Aizawl khawpui chhunga mi an ni a; mi 18 chu Théntlang khaw mite an ni.

June 30-a positivity rate 45.67% hi kuminah a san ber ṭum a ni a, Covid-19 lèn hnua a sàn ber dawttu a ni. June 20, 2021 khan 47.53% a lo ni tawh.

IDSP record angin, Mizoramah Covid-19 vei 2,29,106 hmuh chhuah a ni tawh a, mipa 1,06,640 leh hmeichhia 1,22,466 an ni a, mipa aiin hmeichhia 15,826-in an tam zawk. Nimin tlai dar 5 thleng khan mi 2,28,143 (99.58%) chhuahtir an ni tawh a, mi 703 (0.31%) thi tawhin, enkawl mek mi 260 (0.11%) an awm.

Nimin tlai dinhmun angin, Mizorama district 11 zingah Siaha, Champhai leh Khawzawl district-te Covid-19 positive awm tawh rih lo a; active case tamna ber Aizawl district-ah mi 157 an awm thung.