Lockdown 7.0 hnua awm dan tur Ruahman lâwk turin sorkar ngen

Zoram Peoples' Movement (ZPM) chuan thuchhuah siamin, inkhàrkhip (Lockdown 7.0) zawh hnu lama awm dan tura ruahmanna siam hma turin Mizoram sorkar an phût tih an tarlang. ZPM chuan, inkhàrkhip chung­changah mithiamte thuràwn ngaih pawimawh tur a nih rualin, mipui din­hmun leh sûkthlêk uluk taka thlír chung­in mipui zawh tawka kal turin sorkar an ngen a, "Lockdown 7.0 tàwp hnua kan awm zel dan turah tuna Lockdown 7.0 tàwp hma ngeia ruahmanna ṭha tak siam lâwk a, mipui hriata puangzar thuai turin sorkar kan ngen a ni," an ti.

Covid-19 lakah Mizoram a fihlim ṭan meka a lan laiin, chawpchilh taka inkhàrkhip khauh zawk June 30, 2020 thleng atana puan leh a kenkawh dan­in mipui harsatna a thlen nasa niin ZPM chuan an sawi a, "Hei hi a chhan ber chu, ruahmanna felfai siam lâwk loa lockdown hman mek tàwp hnua awm zel dan tur, lockdown chhunzawm tur a nih leh nih loh) puan a ni har lutuk ṭhin leh, lockdown kenkawh dan tur ruahmanna siam lâwk loh vang a ni," an ti a; hun teptèr lutuka lockdown puanin mipui a tihbuai thu an sawi. ZPM thuchhuah chuan, inkhàrkhipin mipui a nghawng nasa a, eizawnna hna thawh theih loh vangin ni tin khawsaknaa harsatna tawk an tam tawh hle tih a tarlang a, "Mipui a tam thei ang berin eizawnna kawng ṭheuh zawh chunga Covid-19 laka kan him theihna tur, community spread a thlen loh nana ruahmanna siam turin Mizoram sorkar kan ngen a ni," a ti. Mizoram bik chu Covid-19 lakah fihlim lam a pan hret hreta a lan avang­in, boruak a ṭha chhunzawm zel chuan mipuiin eizawnna kawng pangngai an zawh leh theih a beiseiawm hle niin ZPM chuan an tarlang a; Lockdown 7.0 hnu lama mipuiin eizawnna kawng an zawh theih dan tur ngaihtuah tur leh mipui awm dan tur puangzar thuai turin sorkar an ngen a ni.