National Highway siamtute'n Kawng thlangah leivûng an paih zui zel ; Leivûng paihnaa paih turin MJA-in an beisei

Aizawla chanchinbumite chuan MJA Gen. Hqrs bultumin July 2, Inrinni khan Aizawl leh Keifang inkara national highway kawngpui laih leh siam mek an enfiah. MJA chuan, kawng thlangah leivung paih a tam thu leh an paih lai ngei an hmuh thu sawiin, kawng laihna leivungte chu a paihna tura siam (spoil bank)-ah chauh paih ni se an duh thu a tarlang.

Kawng siam mek entu MJA member-te chuan hmun hrang hrangah leivûng tam tak a paihna hmun bikah paih lo a, kawng thlanga hnâwl thlâk an hmu a, kawng thlanga leivûng an paih lai pawh an hmu a ni. Kawng thlanga leivûng paihin lui tê a hnawh nasa tih te, thing leh mau a tichhe nasa tihte an hmu a, leivung paih chu luia nungchate'n an tuar hle turah an ngai tih an sawi.

MJA chuan thuchhuah siamin, NH kawngpui enkawltu leh siamtu NHIDCL leh an hnuaia kawng siamtu company-te chu nungcha te, thing leh maute'n kawngpui siam an tawrh lutuk loh nan leivûng paih dan uluk zawka kalpui turin an chah a, "Leivûng a paihna hmun tura siamah ngei paih se kan duh. A ṭul anga spoil bank siam belh tur leh spoil bank chu ṭha taka dâwl turin kan beisei a ni," an ti.

Mizoram sorkar pawh thuneihna a neih chinah tun aia chîk zawka kawngpui siam enpui tur leh vil tura an beisei thu MJA chuan an tarlang bawk.

MJA member-te hi Saitual DC VL Hruai­zela Khiangte nen DC Conference Hall-ah inkâwmin, kawngpui siam chungchang an sawiho nghal. Saitual DC chuan, kawngpui siam endiktu tur Highway Monitoring Commi­ttee an din tawh thu te, kawng siam­tute hnenah hriattirna vawi eng emaw zat an pek tawh thu leh an hna thawh lai an tihtawpsak ṭhin tawh thute a sawi.

VL Hruaizela chuan, company-te kawngpui laih dan, kawng chhak lam an laih danah dik lo a tam thu te, kawng siam chu a ṭul anga an endik ṭhin rualin, indaih lohna avangin an endik reng theih loh thu te, NHIDCL-in an hnuaia contractor-te an thunun loh thu leh dâwt an sawi fo thu te, leivûng paihin a thlang lama sangha dil leh lui a khawih chhiat nasat thute a sawi bawk.

Saitual DC sawi danin, kawng siamnaa lei laih vanga leiminah mi pahnih an thi tawh a; pakhat chu kawng siamtu zinga mi, excavator operator a ni a, pakhat dang chu civil mi, Champhaia kal tur a ni. Mi pahnih thihnaa lei a min chhan chu lei laih dan a dik loh vang a nih thu PWD hotute'n an sawi.

Saitual Bawrhsap chuan, kawng siam chungchangah complaint an dawn nasat thu sawiin, "Complaint lutte chingfel turin kan hrilh ṭhin," a ti a; kawng ko mìn hlauhawm lo tura siam turin an hriattir ṭhin thu a sawi bawk.

Kawng siamtute'n hmun eng emaw zatah spoil bank an siam a, thawktu pakhat chuan Seling leh Keifang inkarah spoil bank 10 vel an neih thu Vanglaini palai a hrilh. Spoil bank-ah leivung an paih ngei a, mahse, leivûng dâwlna hmuh tur a awm lo. Saitual DC pawhin, "Spoil bank dâwlna an siam lo vek a, a thlang lama sangha dil leh luite a khawih chhe nasa. A remchang lai laiah an paih bawk," a ti.

Thu dawn danin, spoil bank-a leivûng paihte chu a thlang lamah a tawlh thla tur a ni lo a, a tawlh tur dâl nan a dâwlna retaining wall siam ngei tur a ni. Spoil bank atana hman ram neitute hnenah zangnadawmna pek theihna a awm lo a, mahse, spoil bank chu hman ṭangkai theih turin siam rem tur a ni thung.

Thingsul Tlangnuam khaw mi pakhat chuan, chakai an khawrhna ṭhin Sakei lui chu leivûngin a hnawh nasat avangin tui a awm tawh mang lo a, lui sa man tur a awm tawh loh thu Vanglaini palai a hrilh a; Sakei luiin Tuirini a finna vela leilet a tihchhiat nasat thu a sawi bawk.

NH kawngpui siam enfiahnaah hian Aizawl aṭangin chanchinbumi 17 leh Saitual aṭangin MJA member pali an tel a ni. NHIDCL website-a a lan danin, NH-54 Aizawl-Seling chu Gawar Pvt Ltd leh SCC Pvt Ltd ten joint venture-a an thawh a ni a, kum 2020 tìra siam ṭan leh July 25, 2023-a zawh tur niin, May 31, 2022 thleng khan hna thawh tur 34.07% thawh a ni tawh.

NH-6 Seling-Keifang chu GVV Constructions leh NG Projects ten chan insema an siam a ni a, kum 2020 tir lama siam ṭan niin, January 7, 2022-a zawh tura ruahman a ni. Zawh hun tura tihah an zo hman lo a, thawh tur zatve pawh an la thawk zo lo a ni.