Lungkawlha ram buainaah Serchhip YMA-in hma an la

YMA Sub-Headquarters, Serchhip hnuaia Vigi­lance Committee chuan Lungkawlh khuaa Cultural Centre cum Toilet sak tur ram chungchanga buaina awm chu chinfel tumin hma an la a, nimin khan Serchhipa Land Re­venue & Settlement (LRS) department pisaah léngin, settlement officer Lalzikpuii an sawipui.

Serchhip Sub-Hqrs. YMA tarlan danin, Lungkawlh khuaah hian tun hnaiah Border Area Development Project (BADP) aṭangin Cultural Centre cum Toilet sakna tur sum hmuh a ni. Sak an tumna hmun chu a bulhnaia awm chhung­kaw pakhatin an ram a nih thu sawiin, an hauh a, chu vang chuan a satu tur contractor-in sak dan tura ruahman angin a sa thei dawn loa sawi a ni.

Lungkawlh Branch YMA erawh chuan, V/C record-a a lan danin, Centre sak tumna hmun chu ram ruak ngei niin an ngai thung a, hma lakpui turin Serchhip Sub-Hqrs YMA an ngen a ni. Sub-Hqrs YMA hruaitute chuan Lungkawlha Cultural Centre cum Toilet sakna tura ruahman ram inchuh lai chu dan anga teh ṭha turin LRS department-ah ziakin an thlen tih an tarlang.