Lungleia infiamna hmun tur lung phûm

Sports & Youth Ser­vices (SYS) minister Robert Romawia Royte chuan July 2, Inrinni khan Lunglei-a Serkawn leh Zotlang­ah Integrated Semi Indoor Hall sakna tur leh Pûkpuiah Standard Indoor Futsal Ground siamna tur lungphùm a phúm.

Infiamna ruhrel siam­na tur lung phùmte hi Minis­try of Minority Affairs hnuaia Pradhan Mantri Jan Vikas Karya­kram (PMJVK) kaltlanga hmuh cheng nuai 596.91 hmanga siam tur a ni a; Pukpuia futsal ground tur chu a hmingah Laldenga Futsal Ground tih phuah a ni.

SYS Minister chuan, khawpui naupang leh ṭhalaite an insawizawi tlem ta chu a vei thu sawiin, "Sport department chuan holiday football programme – sikul chawlh nía naupang a duh apiang an infiam theihna Aizawlah bul ṭan tum a ni," a ti.

Robert Romawia chuan, Covid-19 vanga sum harsatna avangin sorkar laipui aṭanga SYS department-in sum a hmuhte hman nghal zung zung theih a nih loh thu sawiin, "Sports project ṭhenkhat a khawtlai lo thei lo a, tunah chuan hripui a kian mek tawh avangin Lunglei khawpuia sport project-te hna ṭan kim vek a ni dawn ta," a ti a; Serkawna BCM hmunpui tihchangtlunna tur project atan Ministry of Tourism hnuaia Pilgrimage Rejuvenation And Spiritual Augmentation Drive (Prasad Scheme) aṭangin a thuphunga pawmpuina hmuh a nih tawh thu a sawi.

Serkawn leh Zotlanga semi indoor hall sakna atan cheng nuai 139.69 ve ve ruahman a ni a, Serkawna mi chu Junior Consultancy Services, Tlangnuam-in an sa ve ve dawn. Pukpuia futsal ground siam nan cheng nuai 317.53 ruahman a ni a, hna thawktu atan Creative Minds, Chanmari West thlan a ni.