Tlawng fintu lui hrang hrang tifaiin Mi 1,800 chuang an hnatlang
Central YMA leh PHE department chuan July 2, Inrinni khan 'Tlawng lui fintu lui thenfai hnatlangpui' an huaihawt a, mi 1,800 chuang an thawk chhuak.Tlawng lui fintu lui hrang hranga bawlhhlawhte then fai a ni a, thing ṭiak 250 phun a ni bawk.
Hnatlangpuiah hian Aizawl khawpuia YMA branch-te leh Tlawng luiin a paltlang YMA sub-headquarters leh branch-te aṭangin mi 1,800 an thawk chhuak a; Aizawl khawpui huam chin bik hmun 10 bakah, Serchhip, Mamit leh Lunglei district-a Tlawng lui fintu lui hrang hrangah bawlhhlawh thenfai a ni.
Aizawl leh a bul hnaia hnatlanna hmunte chu - Sakhisih lui, Vailui, Dinthar lui, Hnimtheilo lui, Tuithûm lui, Tuikual lui hmun hrang hrangah a ni a; Sihhmui kaiah leh Lunglei district, Serchhip district leh Mamit district-ah YMA branch hrang hrang an hnatlang bawk.
Hriat theih chinah YMA branch 100 chuang leh PHE department aṭangin mi 1,800 chuang an hnatlang a; Aizawl lamah mi 1,000 vel leh Lunglei lamah mi 600 vel niin, PHE department aṭangin mi 200 chuang an ni. He thu ziah lai hian Serchhip leh Mamit district lama hnatlang zat CYMA-in an la dawng lo.
Hnatlangpui hi PHE department enkawltu deputy chief minister Tawnluia'n Vanapa Hall kawt aṭangin a vailiam a; Tawnluia chuan, Tlawng lui chu Lunglei Zobawk dáia hnár nei, Cachar thlenga luang a nih thu sawiin, "Km. 186-a ni a, Mizorama district pangaah khua 90 chuang a paltlang. Mizoram lui pawimawh leh a bikin Aizawl leh Lunglei district-ah phei chuan kan rinráwl, tui in tura min châwmtu a ni," a ti.
Luia bawlhhlawh tam ber chu plastic bawlhhlawh a nih thu leh plastic aṭanga siamte hman tlem inzirtir a ṭul thu sawiin Tawnluia chuan, "PHE department chu mipui hnena tui in tur ngaihtuahtu kan ni a, Jal Jeevan Mission kaltlangin kum 2023-ah thingtlang khaw tinah tui connection pek vek a ni dawn," a ti a; bawlhhlawh paih chungchangah mi tinin mawhphurhna an neih thu a sawi.
Deputy CM chuan, PHE department-in CYMA nena ṭang dunin hnatlang koh zel pawh a la nih tur thu a sawi bawk.