India-a college ṭha zingah PUC a lang
Pachhunga University College (PUC) chu India rama college ṭha zingah a lang a; Arts leh Science bikah hmarchhak state pariata college ṭha ber a ni. The Best Colleges in India thlang tur hian tehfung paruk a awm.
India Today-in kum tina India rama college ṭha zual a thlanna, The Best Colleges in India 2022-ah PUC hi a vawi khatna atan a lang a, Mizoram aṭanga lang hmasa ber a ni.
India Today The Best Colleges in India-ah hian PUC chu Arts bikah India ram pumah 141-na niin, hmarchhak bialah pakhatna a ni a; Science bikah ram pumah 167-na niin, hmarchhak bialah pakhatna a ni. Commerce zirnaah 183-na a ni a, hmarchhak bialah pathumna a ni thung.
India ramah college 42,343 vel awm anga ngaih a ni a, chu'ng zinga PUC-in dinhmun sang tak a chang pha chu lawmawm a tih thu PUC principal Prof. H Lalthanzara chuan a sawi a; principal kal hmasa te, zirtirtu leh thawktute thawhhona rah a nih thu sawiin, "Hmasawn zel turin ṭan kan lâk zel a ngai a ni," a ti.
The Best Colleges in India-ah arts leh science-ah Hindu College, New Delhi chu pakhatna a ni ve ve a, commerce-ah Shri Ram College of Commerce, medical-ah AIIMS, New Delhi, engineering-ah IIT, New Delhi-te pakhatna an ni.
PUC-ah hian under graduate-ah arts, science, commerce leh management zirna awmin, department 23 a awm a, post graduate-ah Mizo, Phylosophy, Life Sciences, Geo-Physics leh Statistical Mathematics zirna a awm. NAAC accreditation A+ a ni a, ISO certified college a nih bakah, DBT star college a ni. NIRF ranking-ah India ram college ṭha 101-150 inkarah awmin, ramngaw a neih ṭhat avangin Green Audit 2021-ah a sang ber Platinum rank pek a ni bawk.