Speaker-in KMMTTP kawngpui a enfiah

Assembly speaker Lalrinliana Sailo chuan June 1, Zirtawpni khan Lawngtlai aṭanga Zochachhuah inkara Kaladan Multi Modal Transit Transport Project (KMMTTP) kawngpui leh Myanmar ram chhunga kawngpui siam mek a enfiah.

Lalrinliana Sailo chuan, Zochachhuah aṭanga Myanmar (Kaletwa-Paletwa) kawng laih hna muang lutuk leh tun thlenga hmalakna mumal a awm lo chu thuneitu sang lamah bawhzui vat a tum thu a sawi a; Mizoram chhung bika KMMTTP kawngpui siam chu ṭha thawkhata a ngaih thu leh hna pawh an zo titih tawh chu lawmawm a tih thu a sawi.

KMMTTP kawngpui siam mekah Lawngtlai aṭanga Zochachhuah inkar bik chu hna thawh tur zinga 96.40% thawh zawh a ni tawh a, lei (bridge) pariat dawh tur zinga paruk dawh zawh a ni tawh. Kumin December-ah hawn hman tum a ni.

Zochachhuah aṭanga Myanmar ram chhung, Kaletwa inkar chu km 48 a ni a, Kaletwa aṭanga Paletwa chu km. 60 a ni. Zochachhuah-Paletwa hi Ministry of External Affairs hnuaiah Engineering Projects (India) Ltd leh RKRPP ten an thawk dun a, kawng hian Myanmar rama khaw 24 a paltlang dawn. Pilot cutting km. 21 vel sial a ni tawh.

KMMTTP kawng entu Assembly Speaker hi Lai Autonomous District Council-a executive member pali - Lallawmsanga Apetow, C Rongura, BN Thangpuia leh C Hrangthianga te bakah, PWD leh sorkar hotu dangte'n an ṭawiawm a ni.