KHAWTHLIR
Thisen pe
KṬP, Tuikhuahtlang Branch chuan an kohhran silver jubilee pualin July 2, Inrinni khan an kohhran hall-ah thisen pek an huaihawt a, Synod Hospital tan thisen unit 36 an pe a, petute mipa 32 leh hmeichhia pali an ni. KṬP, Muallungthu Branch pawhin Inrinni khan ZMC-ah thisen unit 35 an pe a, petute mipa 30 leh hmeichhia panga an ni.
Ralthuam man
Lunglei police-te leh 3rd Assam Rifles sipaite chuan July 1, Zirtawpni khan Lunglei Circuit House bulah .22 pistol pahnih leh a mu 50 an man. Assam Rifles-te chuan July 1 vek khan Noaotla, Siaha district-ah bore shotgun mû 13,500 leh airgun an man bawk.
Zari Jail Diary CM-in tlangzarh
B Vanlalzari lehkhabu ziah, 'Zari Jail Diary' tih chu July 2, Inrinni khan Synod Conference Centre-ah chief minister Zoramthanga'n a tlangzarh. B Vanlalzari hi Mizoramin zalenna a sual laiin sipaiin an man a, dam chhunga lung-ina táng turin a chungthu relsak a lo ni tawh a; lehkhabuah hian jail-a a tàn laia a thil tawnte a ziak a ni.
SBI hotu thar
State Bank of India (SBI) North East Circle chief general manager thar Arvind Kumar Singh chuan July 1, 2022 khan Guwahati-ah mawhphurhna a la ṭan. Arvind Kumar Singh hian hmarchhak state pasariha SBI hnathawh a enkawl dawn a ni.
DC-in enfiah
Khawzawl district bawrhsap CC Lalchhuangkima chuan July 2, Inrinni khan Khawzawl aṭanga Champhai panna tur national highway (NH) no. 6, Tuimuk lui kama siam mek leh kawng siam vanga leileta harsatna thlengte a enfiah a, kawng siamtu leh leilet neitute a kâwm.CC Lalchhuangkima chuan, kumin chhungin loneitute'n buh an phun hman ngei theih nan hmalak a nih tur thu a sawi a; tun hnaia ruahsûr avanga leimin leh thil dangin NH-6 siam mek a tihchhiatte a hmalak dan turte a sawipui bawk. Kawng laih vang hian leilet neitute'n buh an la phun thei lo a ni.
Say no to plastic
Serchhipa Assam Rifles-te chuan International Plastic Free Day pualin July 2, Inrinni khan Khawbungah ‘Say no to plastic’ programme an buatsaih a, tualchhung mi eng emaw zat telin, plastic ṭhat lohna an hrilhfiah.
Treasury Luah tan
Khawzawl district Treasury office thar chu July 1, 2022 khan luahluh ṭan a ni a, Tuichang bialtu MLA Tawnluia, dy. chief minister-in a hman pui. Tawnluia chuan Khawzawla Treasury office hanthawh bulṭan a ni ta chu lawmawm a tih thu sawiin, "Remna Ni-ah bulṭan hman tum ni mah se, inpeih hman a nih loh avangin July 1 aṭanga hna ṭan tura ruahmanna siam a ni. Office hawn hmasak ber niah Pathian hnena hlanna hun neih nise tih a nih angin hetiang hian hun hman a ni ta a ni," a ti. Treasury office atan hian Khawzawl Vengthara WC Thandawla in luah a ni a, tun dinhmunah thawktu Treasury Officer bakah AO, AAO, LDC leh fourth grade-te an awm a ni.
Thlànmual min
Inrinni zana ruahsur avangin Tuikual thlànmual a min a, thlàn panga a tihchhiat bakah, thlàn chhe mai thei tura ngaih 70 vel a awm. Tuikual khawtlang chuan nimin khan hnatlang an ko a, thlàn chimte an senghawi bakah, thlàn chhe mai theia ngaihte venna tur an siam a ni.