Covid-19 vangin mi pahnih an thih belh

Mizoramah Covid-19 vei July 1, Zirtawpni khan mi 41 leh July 2, Inrinni khan mi 15 hmuh chhuah a ni. Inrinni leh nimin khan hripui vei dam tawh mi 83 chhuahtir an ni a; Inrinni khan Covid-19 vangin mi pahnih an thi.

July 1, Zirtawpnia Ningani Covid-19 positive hmuh hmuh thar mi 41-te chu mipa 19 leh hmeichhia 22 an ni a; RT-PCR laboratory-a hmuh chhuah mi pakhat leh RAT hmanga hmuh mi 40 niin, positivity rate 20.50% a tling.

Inrinnia Covid-19 vei hmuh hmuh thar mi 15-te chu mipa 10 leh hmeichhia panga an ni a; Rapid Antigen Test hmanga hmuh chhuah vek niin, positivity rate 14.71% a ni.

Hripui vei inenkawl zinga dam tawh mi 46 chu July 23, Inrinni khan chhuahtir an ni a, nimin khan mi 00 chhuahtir an ni bawk.

Covid-19 positive enkawl lai Lalremruata (48), Saikhamakawn chu July 2, Inrinni zing dar 9:55 khan State Referral Hospital-ah a thi. Lalremruata hi natna dang vangin June 15, 2022 khan SRH-ah dah luh a ni a, Covid-19 positive a ni tih June 18 khan finfiah a ni.

July 2 vek zan dar 8:20 khan hripui vei Lalpianga (62), Chanmari West chu SRH-ah a thi. Lalpianga hi Covid-19 positive a ni tih June 28 khan hmuh chhuah a ni a, SRH-ah dah luh nghal a ni.

IDSP record angin, Mizoramah Covid-19 vei 2,29,162 hmuh chhuah a ni tawh a, mipa 1,06,669 leh hmeichhia 1,22,493 an ni a, mipa aiin hmeichhia 15,824-in an tam zawk. Nimin tlai dar 5 thleng khan mi 2,28,226 (99.59%) chhuahtir an ni tawh a, mi 705 (0.31%) thi tawhin, enkawl mek mi 231 (0.10%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Champhai, Khawzawl leh Hnahthial district-te a awm a; positive active case tamna ber Aizawl district-ah mi 131 an awm a, Serchhip district-ah mi 46 leh Lunglei district-ah mi 31 an awm bawk.