Mistiri leh helper thiamna endik ṭul an ti

Man Power Development Board chu an chairman Lalchhandama Ralte, Labour, Employment, Skill Development & Entrepreneurship (LESDE) minister hoin July 1, Zirtawpni khan an ṭhukhawm a; in saknaa thawktu mistiri leh helper-te thiamna endik a ṭul thu an sawi.

Ṭhutkhawmah hian LESDE department-a péng hrang hrang - Man Power Development Board leh Covid-19 avanga harsatna tawk MBOCWWB hnuaia Welfare Board member-te ṭanpuina pek tawh dante sawiho a ni a; Aizawl, Lunglei leh Siahaa industrial training institute-te tlawh a, hmalakna hrang hrang leh hmasawnna tur pawimawh la awmte endik turin tlawh chhuah vek ni se, an ti.

In saknaa thawk mistiri leh helper-te thiamna endikna - skill certification leh skill test neih leh state dang aṭanga hnathawk tura lo lutte endik a ṭul thu an sawi a; Mizo ṭhalai, eizawnna nei lote tana eizawnna tlâk thiamna an neih theih nan skill training chi hrang hrang kalpui dan tur leh, Mizo ṭhalaite eizawnna hrang hrang thawk tura tirh chhuah an nih theih nan Aizawlah ṭawng zirna, Foreign Language Training Centre din turin Delhi-a embassy hrang hrang nen thawkhoa hmalakna kalpui an rél bawk.

LESDE Minister chuan, Mizo ṭhalaite'n an thiamna leh theihnate hmang ṭangkai a, an thawh theih tâwk eizawnna tlâk an hmuh ngei theih nan sorkar leh mipui ṭanrual a pawimawh thu a sawi.