Chhiatnaa mawhphurhnate inhrilh

Serchhip District Disaster Manage­ment Plan hnuaia chhiatna thleng lo hmachhawn tura ruat (Incidence Response System/IRS)-a mawhphurtu officer (responsible officer)-te chu nimin khan district bawrhsap Dr Lalzirmawia Chhangte hoin DC meeting room-ah an ṭhukhawm a, chhiatna thleng a awma an mawhphurhna hrang hrangte an inhrilh.

Dr Lalzirmawia Chhangte chuan, khuarèl chhiatna chu thunun theih ni lo mah se, chhiatna nasa lutuk a awm loh nan invèna lo inbuatsaih theih a nih thu a sawi a, "Tun hma chuan chhiatnate kan sepui ruah tuar deuh mai a, a thlen hnuah chhawmdawlna leh inkhai chhuahna lam kan thawk deuh mai ṭhin," a ti.

Kum 2005 aṭangin India ramin Disaster Act neiin, chhiatna a thlen hma aṭanga inbuatsaih lâwkna dan nen hmalak a ni tih sawiin Serchhip DC chuan, "Chu ruahmanna hnuaiah chuan Incidence Response System fel tak awmin, mawhphurhna hrang hrang kan insem ta a ni," a ti a; mawhphurtute'n an mawhphurhna ṭheuh an hriat chian a, an intuaithar reng a ṭul thu a sawi.

Meeting-ah hian Quick Response Team din a nih thu leh hman ṭangkai dan te, office tinin Disaster Management Plan an neih a ṭul dan te, chhiatna a thlena District Emergency Operation Centre tihnun leh kalpui dante leh, District Disaster Management Plan anga chhiatna thleng hmachhawn dan tur tlangpuite zirho a ni.