PHE department-in tui bill tihsan Rawtna sorkarah thehluh an tum

Public Health Engineering department chuan tui bill tihsan rawtna sorkarah thlen an tum a, an inbuatsaih ṭan dawn. PHE enkawltu Tawnluia, deputy chief minister chuan, tui bill tihsan chu tihmâkmawh a nih thu a lo sawi tawh a ni.

Vanglaini palai zawhna chhangin PHE engineer-in-chief C Lalremsiama chuan, tui bill tihsan a ṭul thu sawiin, "Ṭum eng emaw zat tui bill tihsan rawtna sorkarah kan thehlut tawh a, a hlawhtling ngai lo. Rawtna hi kan thehlut leh dawn a, eng zata pung turin nge rawtna kan thlen dawn tih kan la tifel lo," a ti a, tui bill chu tihsan a nih lohna a rei tawh thu a sawi.

C Lalremsiama chuan, tui bill tihsan rawtna chu 20% aia sang loa an siam tur thu sawiin, "Tunah hian department chuan mipui hnena tui semna atan cheng tam tak kan chawi belh. Chutihrual chuan, chawi belh lo tur chuan mipuiin an tuar lutuk dawn. Eng emaw chen chu sorkarin a subsidise ve a ṭul. State ṭhenkhatah chuan a thlàwnin an sem a, kan state dinhmunah chuan a la theih ve loh," a ti.

PHE E-in-C sawi danin, tui bill tihsan rawtna an thehluh turah mipui tana phurrit lutuk lo, department pawhin an chawi belh nasa lutuk tléma tiziaawm tur zawnga ruahman an tum a ni.

Tui bill chu kum tin tihsan ni se duhthusam a nih thu sawiin C Lalremsiama chuan, "Tlém tlémin tihsan ni se, mipui tan pawh a ziaawm ang. Hun rei tak chhung tisang loa, tihsan thut a nih hian mipui tan phurrit a tling zawk," a ti.

Tarlan tawh angin, PHE department-in June 23, 2022-a an hnathawh thlir lêtna hun an hmannaah Dy. Chief Minister chuan, thil man sang zel ngaihtuahin tui bill ennawn a hun tawh thu a sawi.

Tawnluia chuan, tui bill ennawnna ṭum hnih ruahman a ni tawh tih sawiin, "Mahse, Covid hripuiin min tuam avangin mipui tan phurrit a ni dawn a, kaltlangpui a ni lo. Tui bill tuna kan hman mek hi kum 11 chuang kan hmang tawh a, Tlawng tui pump leh sem nan department-in tui litre khat zelah pawisa 7 a sèn laiin litre 5,000 chin hmangte chuan pawisa 4 chiah an chawi a ni," a ti.

Sorkarin tui litre khat zela a chawi belh chu pawisa 3 a nih thu sawiin PHE Minister chuan, "Hei hi subsidy-ah a ngaih theih. Sorkar tan sum hlohna a ni. Thil man sang zel ngaihtuah chung leh department pawh sum thawk chhuak tura revenue target-te tuk an nih ṭhin angin tui bill ennawn a hun ve tawh hle a, kan tihmâkmawh a ni," a ti a; tui bill ennawn chu mipuiin an hriatthiam a ṭul thu a sawi a ni.