KHAWTHLIR

LMC-ah hmeichheseat a awm dawn
State Election Commission chuan nimin khan Lunglei Municipal Council (LMC) inthlan hmasa bera hman turin LMC-a ward 11 zinga ward pali chu hmeichhe tana hauh tur a nih thu a tarlang. Hmeichhe seat turte chu mumal taka ṭhumvàwra thlan ṭhin tur a ni a, hmeichhe seat chu thlak kual ṭhin tur a nih thu a tarlang bawk.

YMA-in puan hlan
Aizawla Ramthar Veng Branch YMA chuan Aizawl khawpuia police station hrang hrang hnenah puan 61 an hlàn. Chhiatna a thlenin police-te chu a hmuna thleng hmasa an nih ṭhin avangin, mitthi an awm a, ruang khuhna atan Ramthar Veng Branch YMA hian police hnenah puan an pe a ni.

Tuizém sem
AMC Ward-X councillor Chuauzikpuii chuan nimin khan Zonuam venga chhungkaw 10 hnenah tuizem a sem. Chuauzikpuii chuan, tuizem chu AMC councillor-ten tied fund an neih hmanga lei, tuizem leina nei lote tana sem a nih thu a sawi a; tuizem dawng turte chu MNF unit leh local council-te'n uluk taka an thlan thu a sawi bawk.

IPR inhrilhfiah
National Institute of Technology, Mizoram hnuaia Institute Innovation Council chuan Ministry of Education (Innovation Cell) leh AICTE-te nen ṭanghoin nimin khan 'Kalam Programme for Intellectual Property Literacy and Awareness Campaign hnuaiah Intellectual Property Rights (IPR) Awareness Programme an buatsaih. State páwna mithiamte'n trademark, design, GIS, SICLD registry leh mimalin patent file an tih theih dante an zirtir a ni.

MZP President tel
Chin Baptist Church (CBC), USA chuan June 30 - July 3, 2022 chhung khan Dallas, USA-ah 7th Trennial Conference an hmang a, Mizoram aṭangin MZP president Lalnunmawia Pautu a tel. Chin Baptist Church hian Myanmar buaina avanga harsatna tâwkte ṭanpui nan MZP President hnenah US dollar 1,000 an hlân a ni.