High Court Judge-in Serchhip a tlawh

Gauhati High Court judge Justice Michael Zothankhuma chuan nimin khan Serchhip District Court a tlawh a, ukilte kâwmin, an mamawh te a zawt.

District thuneitute nen an inkawmnaah justice Michael Zothankhuma chuan, dan angin district court endika kal a nih thu a sawi a, "Court-in file a kalpui te, case awm mek te, district court-in mamawh a neih te, quarters-te leh hmabak awm hrang hrangte ka rawn en a ni," a ti.

High Court Judge hian Serchhip district-a official-te chu district jail dinhmun te, harsatna an neih leh neih loh te, Police department-in district court nena an thawhhonaah harsatna an neih leh neih loh te, Excise & Narcotics department-in court nena an indawrnaah harsatna an neih leh neih lohte a zawt a; NH-54 zauh hna thawh mek chungchang an sawiho bawk.

Serchhip district thuneitute nena an inkawm zawhah Justice Michael Zothankhuma chuan court a enfiah a, district court-a file kal dante a en bakah, mamawh an neihte a enpui a; Khawtetlanga quarters-te a tlawh bawk a ni.