Pángkhuaah vawk 56 suat a ni

Lawngtlai district-a Pángkhuaah African Swine Fever a lèn avangin nimin khan vawk 56 suat a ni a; tun hnaia vawk thite pawh ASF vanga thi an ni tih finfiah a ni.

Sangau aṭanga thu dawn danin, Sangaua veterinary doctor Dr Lalrinkimi leh Police station-a OC Vanlalhlimpuia te kaihhruaiin nimin khan Pángkhuaah vawk 56 suat a ni a; vawk tihhlum tâkte chu ASF kái, symtom neite a ni hlawm.

Chawlhkar liam taa Pangkhuaa vawk 16 thite chu ASF vanga thi a ni tih nimin khan nemngheh a ni a; ASF vangin vawk 21 a thi tawh a, nimina vawk 56 suat nen ASF vangin vawk 77 a thi tawh a ni.

Sangau Ramhlunah pawh tun hnaiah vawk panga a thi a, mahse, rapid test-ah ASF positive mah se, laboratory-a test result hriat a la ni lo.

Sangau SDO (Civil) Samuel Zodinsanga chuan, ASF a lèn avangin June 29, 2022 khan Sangau leh a chhehvel khua - Pángkhua, Thaltlang, Sentetfiang leh Cheural khuaahte vawk talh, hmun dang aṭanga vawk lak luh leh vawk sa aṭanga thil siam lak luh khapna a tichhuak tawh a ni.