Ruihhlo chungchang zirhona buatsaih

Mizoram Social Defence & Rehabilitation Board (MSDRB) leh SCERT-te chuan nimin khan SCERT Auditorium-ah 'Training of master trainers for drug prevention in schools' an buatsaih ṭan a, Social Welfare secretary Arun Mishra-a'n a hawng.

Master trainer training hi July 6, 2022 thleng awh tur a ni a, Mizoram district hrang hranga DIET lecturer-te telin, drugs expert Debashis Mukherjee-a'n ruihhlo (damdawi hman sual) chungchang a zirtir dawn a ni.

Naupang kum milin drug module siam a ni a, primary school, middle school, high school leh higher secondary school-ahte hman theih tura buatsaih a ni. Master trainer-te'n an awmna district-ah drug module hmangin zirtirtute an zirtir ve leh dawn a, zirtirtute'n naupangte hnenah an kum milin ruihhlo chungchang an zirtir ve leh dawn a ni.

Sorkar thuchhuah tarlan danin, Social Welfare & Tribal Affairs department hnuaia MSDRB hmalaknaa naupang kum 18 hnuai lam zirchianna, 'Study on Drug use amongst children between 10 to 17 years in Mizoram 2022' tarlan danin, kum 5 liam ta aiin tun dinhmunah naupang ruihhlo ti an tam a, ruihhlo an tih ṭan kum pawh a naupang telh telh a ni.