Aspirational District hmalaknate sawiho

Sorkar laipuia joint secretary Umakant, Central Prabhari Officer for Aspirational District, Mamit ni bawk chuan nimin khan Mamit a tlawh a, district official-te nen DC Conference Hall-ah Aspirational District hnuaia hmalaknate an sawiho.

Meeting-a tarlan danin, ranking hnuhnung ber May 2022-ah Mamit district chu Health & Nutrition-ah 112-na a ni a, Education-ah pariatna, Agriculture & Water Resources-ah 72-na a ni. Financial Inclusion & Skill Development-ah 62-na leh Basic Infrastructure-ah parukna a ni bawk.

Ṭhutkhawmah hian Aspirational District hnuaia Mamit district-a hmalaknate a lem nena inhrilhfiah a ni a; Delta ranking-a Mamit dinhmun aṭangin hmasawn ngai lai leh hmachhawpte sawiho a ni.

Umakant chuan, Health & Nutrition lama dinhmun hniam taka Mamit district a awm chu pawm harsa a tih thu sawiin, pawi a tih thu a sawi a, theihtawp chhuah turin a kaihhnawih department official-te a hrilh. Kawng chungchangah, Ministry of Road Tranport & Highways-ah bawhzui a tum thu a sawi bawk.

Mamit Aspirational District CPO chuan, Mamit district chàwi kânna tura hnathawhte chu mipui hnen a thleng ṭha em tih hriat a nih theih nan mipui aṭanga feedback system siam a ngaih thu a sawi a; a kaihhnawih department leh Mamit district mipui awm khawmna Whatsapp group siam turin official-te a hrilh a ni.

Umakant hian vawiin hian Mamit leh a chhehvel khuaa hna thawhte a hmunah a tlawh dawn a ni.