Rîk deuh nak nakte hi kan inpumkhatna siamtu leh kan chakna hnár a ni - ZPM President

ZPM party president Lalliansawta chuan, an party chuan han rîk deuh nak nak an neihte chu an inpumkhatna siamtu leh an chakna hnár a nih thu a sawi.

Lalliansawta hian nimin khan an pisaa inkhawmah thu sawiin, ZPM chu pawl hrang hrang inzawm khawm an nih thu sawiin, "Eng emaw chánga han rîk deuh nak nak lai nei ṭhin mah ila, hei hi kan inpumkhatna siamtu, kan chakna hnár a ni. Tunah pawh sorkarna siam ngei tumin chak takin kan kal zel a, party ṭhangduang leh chawr no mek zel, a ṭhan zelna tura tui petu ni vek turin party mipui ka chah a ni," a ti.

ZPM-a telte chu páwl hrang hrang infin khawm, ze hrang hrang nei, pawl hrang hrangte zâi khata luang khawm an nih thu sawiin Lalliansawta chuan, "Harsatna eng eng emawte chu tâwk ve ṭhin mah ila, vawiin thlengin lungrual takin ke kan la pên zel a ni. Chhungkuaah pawh fate rilru leh ngaihtuahna a thuhmun vek ngai lo a, nu leh pa ngaihdan pawh a rual loh chang a awm fo," a ti a; chhungkua an nih miau avangin an inpumkhat tlat ṭhin a, chu chuan zahawmna leh chakna a ken thu a sawi.

ZPM President chuan, mi tam takin kum 2023 inthlanah ZPM-in sor­karna a chan ngei tawh an ring nia sawiin, "Hnehna changa tláng chhîp thleng tur erawh chuan kawng thui tak lâwn tur kan nei a, kawng kan insah chawp a ngai. Kum 2023 inthlan hmachhawn tumin party a insingsa ṭan mek a, tunah hian Search Committee pawh dinin hmalak mek zel a ni," a ti.

ZPM thuchhuah chuan, nimina inkhawm­ah hian an party zawm thar an lawm lut tih a tarlang.