Mizorama hripui vei tawh zat 20.89%

July 3, Pathianni khan Mizoramah Covid-19 vei mi 48 hmuh chhuah a ni a, nimin khan hripui vei dam tawh mi 48 chhuahtir an ni. Covid-19 vangin nimin khan mi pakhat a thi a, tun thlaah ni li chhungin mi pathum an thi tawh.

Pathiannia Covid-19 positive hmuh thar mi 48-te chu mipa 28 leh hmeichhia 20 an ni a; RAT hmanga hmuh chhuah vek niin, positivity rate 22.12% a ni. Hmanraw dang hmangin swab sample endik a ni lo.

Mizorama Covid-19 positive hmuh tawh zat 2,29,210 chu kum 2011 chhiarpuia mihring awm zat 10,97,206 aṭanga chhûtin, 20.89% a tling a, India rama state leh union territory-te zingah a sang berte zinga mi a ni.

Nimin chawhma dar 10 khan hripui vei enkawl lai Hrangkiauva (94), Chanmari, Aizawl chu State Referral Hospital-ah a thi a, Covid-19 vanga thi 706-na a ni. Hrangkiauva hi Covid-19 positive a ni tih May 31, 2022 khan hmuh chhuah a ni a, natna dang nei tel niin, June 13 khan SRH-ah enkawl ṭan a ni.

IDSP record angin, Mizoramah Covid-19 vei 2,29,210 hmuh chhuah a ni tawh a, mipa 1,06,697 leh hmeichhia 1,22,513 an ni a, mipa aiin hmeichhia 15,816-in an tam zawk. Nimin tlai dar 5 thleng khan mi 2,28,274 (99.59%) chhuahtir an ni tawh a, mi 706 (0.31%) thi tawhin, enkawl mek mi 230 (0.10%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pali - Siaha, Champhai, Khawzawl leh Hnahthial district-te a awm a; positive active case tamna ber Aizawl district-ah pung zelin, mi 145 an awm a, Serchhip district-ah mi 35 leh Lunglei district-ah mi 32 an awm bawk.