Champhai khawpui chhunga Sorkar pisate dan tum a ni
Champhai Joint Action Committee chuan, Champhai District Hospital-a doctor dah belh tura sorkar nawr nan, May 3, Nilaini aṭangin Champhai khawpui huam chhunga sorkar pisa zawngnzawngte dan an tum.
Thu dawn danin, Champhai JAC hruaitute chuan tun hnai khan Aizawlah sorkar hotute an dâwr a, chutah chuan thu lawmawm lam dawng loa an inngaih avangin, April 29-a Champhai Kahrawt YMA Hall-a JAC hruaitute ṭhukhawm chuan May 3 aṭangin tiam chin awm loa Champhaia sorkar piasate dan an rêl a ni. Zirna-inte erawh chu an dan an tum lo.
Sorkar pisate dan an tumnaa thil tih dan tur kimchang chu vawiinah ngaihtuah an tum nia thu dawn a ni bawk.
Champhai JAC-ah hian tlawmngai pawl hrang hrang aiawh te, Champhai V/C Association aiawhte leh political party hrang hrang aiawhte an tel a; chairman chu Champhai District V/C Association chairman K Lalmawia niin, secretary chu NGO Coordination Committee secretary Dr Laldinthara a ni.
Champhai JAC hruaitute hian April 25 leh 26 khan Home minister R Lalzirliana a chenna inah an hmu a; R Lalzirliana chuan, doctor 26 lak thuai tum a nih thu leh an mamawh doctor chu doctor 26 lak aṭanga pek tum a nih thu a lo hrilh. April 26 vêk khan Health minister Lal Thanzara, Health Secretary leh Principal Director-te an hmu bawk.
Champhai District Hospital-a doctor dah tura sorkar nawr nan MZP headquarters, Champhai chuan Champhai khawpui chhungah total bandh an lo huaihawt tawh a; chutah chuan buaina chhuakin, Champhai DC Complex-a lirthei panga a kâng a, a hnuah Bethel Venga Circuit House bungruate tihchhuah a ni.