AIZAWL FC CHAMPION

India rama football inelna sang ber, I League-ah Aizawl FC an champion. I League inkhel hnuhnung ber nizana Shillong-a khelhah Aizawl FC leh Shillong Lajong te 1-1 in an inhnehtâwk a, vawi 18 khelhah Aizawl FC hian point 37 an hmu a, India rama club inelna sang berah an champion ta a ni.

Aizawl FC team hi vawiinah Aizawlah an rawn haw dawn a, tlai dar 5-ah Lammualah champion lawmna inkhawm neih a ni ang. A lawmnaah hian Mizoram mipui a tam thei ang ber an tel theih nan chief minister Lal Thanhawla chuan vawiin, Thawhṭanni chawhnu lam zawng sorkar chawlh (half holiday)-ah a puang.

Sports minister Zodintluanga chuan, India ram, mihring tluklehdingawn khat chuang awmnaa Mizoram club a champion ta chu thinlung taka a lawmpui thu a sawi a, "India ram champion kan ni thei ta hi Mizoram sorkar, Mizo football player-te leh Mizo mipuite thawh rah a ni a, Aizawl FC leh an player-te ka chhuang tak zet a ni," a ti.