World Veterinary Day hmang

World Veterinary Day pualin AH&Vety department, Mizoram State Vety Council leh Indian Veterinary Association ten April 29, Inrinni khan Aijal Club-ah inkhawm an buatsaih a, AH&Vety secretary B Lalthanliana'n a hmanpui.

B Lalthanliana chuan, Mizo mipui tam zawk chu antibiotics mahni thua inchawh leh course dik taka ei loh pawizia hrethiam lo an nia sawiin, "Antibiotics hman fimkhur chungchanga inzirtirna chu tun aia uar lehzual a ṭul," a ti a; ran an hrisel loh chuan an bula cheng mihringte pawh a hrisel theih loh tih sawiin, mipui leh ran vulhte an hrisel zawk nan ṭhahnemngai taka thawk turin kalkhawmte a fuih.

Inkhawmah hian Day thupui, 'Antimicrobial resistance from awareness to action' tih chu ICAR scientist Dr Lalhriatpuii'n a sawi a, ran vulh ṭhan chakna atan antibiotics pek chu sa eitu mihringte tan a ṭha lo tih sawiin, "Tun dinhmunah India ram hi antibiotics hmang nasa ram kan ni a, antibiotics hman nasat ngai lo tura mihring leh rante hriselna enkawl uluk a pawimawh," a ti.

World Veterinary Day hman­naah hian chawhnuah Indian Veterinary Association (Mizoram Chapter) General Meeting leh hruaitu thlanna hun hman a ni.