Serchhip khelmuala phul lem phah tum dan Serchhip YMA-in a ṭha tâwk loah an ngai

YMA sub-headquar­ters, Serchhip hnuaia Vigilance & Monitoring Committee hruaitute chuan Inrinni khan Ser­chhip Complex Field-a phûl lem phah tum mek an tlawh. Phûl lem phahna tura khelmual siam danah lungawi loin, contractor chu drawing leh design-te Serchhip YMA pisaa thehlut turin an hriattir.

Complex Field-a football stadium sak mek hi kum 2011-a sak ṭan niin, kum hnih chhunga zawh tura tih ni mah se, tun thlengin zawh a la ni lo. Serchhip YMA Vigilance & Monitoring Committee hian a hmain stadium sak nana hman tura lak khawm balu ṭha lo truck phur 52 an lo paihtir tawh bawk.

Stadium saknaa con­tractor chu NBCC a ni a, NBCC hnuaia BGM company, Kolkata-in an sa a; BGM hian kum 2011 - 2015 chhung an khawih hnuah, chhan eng eng emaw avangin bàn (terminate) an ni a, kum 2016 bul lam aṭangin Agni Shanti BuilTech Ltd., Guwahati-in an sak chhun­zawm a ni. Tun dinhmunah structure peih thawkhat a ni tawh a, khelmual chhuata phûl lem phahna tur khawih mek a ni.

Serchhip YMA Vigi­lance & Monitoring Committee hruaitute sawi danin, phûl lem phahna tur khelmual chhuat siam mek chu a hnuai ber (first layer)-ah milimeter 100-150 vela lian lung hman tur a nih laiin, mihring lu tiat leh a aia liante an hmang a; second layer-ah milimeter 40-60 inkara lian lung hman tur niin, third layer-ah milimeter 10-20 inkara lian hman tur a ni thung.

Serchhip sub-hqrs. YMA Vigilance & Moni­toring Committee chuan, football ground first layer-a lung hman lian lutuk te, third layer-a lei chhùn a ni te, third layer chunga phûl lem phah hma chiaha alkatra hmanga metal tur ni lo anga contractor-in an sawi te, official gallery-a plastic chair fix-a dah inhnaih lutukte chu zir chian ni se, an ti. Contractor leh NBCC engineer-te chu stadium leh field drawing, design leh specification-te vawiin chawhma dar 10-ah YMA pisaa thehlut turin an hriattir a ni.

Serchhip Sub-Hqrs. YMA Vigilance & Moni­toring Committee-te hi an chairman Kapliana Pachuau hoin an kal a; Serchhip Sub-Hqrs. YMA president R Sang­hmingthanga leh secretary Lalrammawia leh hruaitu dangte'n an ṭawiawm a, Serchhipa PWD executive engineer Zothangsang Intote leh Lushai Engi­neering-a project manager John Russ-te an tel bawk. Contractor Probal Agni Hotri leh NBCC engineer Mithun Das ten an lo dawngsawng.