Mizoram Urban Areas Control Bill, 2017 Cabinet ngaihtuah turin peih a ni tawh

Mizorama khawpuia in neitu leh in luahtute chungchanga sorkarin dan a duan thar, The Mizoram Urban Areas Control Bill 2017 chu duan zawh a ni tawh a, Cabinet meeting-a pawmpui turin Political & Cabinet-ah thehluh ni tawh mah se, Cabinet-in a la ngaihtuah lo.

Urban Development & Poverty Alleviation (UDPA) department hotute chuan, Mizoram Urban Areas Control Bill hi khawpuia chengte nghawng thil a nih avangin an kuta pe turin GAD hnenah dilna a thehlut tih an sawi a; The Mizoram Urban Areas Rent Control Act, 1974 chu a hlui tawh a, tuna khawpuia khawsak phung tam tak nen a inmil tawh loa hriat a nih avangin a thlakna atan duan a ni tih Vanglaini palai an sawi.

UDPA hotute sawi danin, Mizoram Urban Areas Control hian sorkarin pisa atana mimal in a luah dawnah, a luah man chhût chhuahna dân tlawhchhhanah an hmang ṭhin a, chuta tan bak chuan mipui náwlpui tan hman a ni ngai lo.

Mizoram Urban Areas Control Bill duan mek hi Cabinet meeting-in a pawm atan January 18, 2017-ah UDPA chuan Political & Cabinet department-ah a thehlut tawh. Cabinet-in an pawm chuan, Assembly session awm leh hmasa berah put luh a ni ang. Assembly session-ah pawm a nih chuan, hman a nih theih nan Law & Judicial department-in gazette turin Printing & Stationery department an pe leh ang a; chumi hnuah rules siam a ni ang.

Urban Areas Rent Controll Bill 2017 hi National Model Urban Rent Control Bill zûlzuia a siam a ni a, kum 1974-a dan siam tawh thlakna atana dan duanah hi Law & Judicial department chuan March 27, 2015-ah a lo pawm tawh.

He dan thar hnuaiah khawpui chhunga cheng in neitu (landlord)-te leh in luahtu (tenant)-te chanvo leh mawhphurhna bakah, a kaihhruaina chi hrang hrang a awm awm. In neituin in luah man duh duh huna a tisâng ṭhin khuahkhirhna te, in luahtute venna tur chi hrang hrang te, tih tur leh tih loh tur chi hrang hrangte a awm bawk.

Dân thar hnuaiah hian controller an awm dawn a, in luahtu leh a neitute inkarah thubuai a awm chuan controller hnenah thlen tur a ni a, judicial proceeding anga kalpui a ni ang a, thubuai a lut a nih chuan controller-in a ngaihtuah ang. Controller chu sorkar ruat tur a ni a, district tina DC pisaa officer tu emaw ruat tur a ni. Thubuaia thiam loh chang chu Rs. 10,000 thleng chawitir theih a ni ang.

In luahtute hnawhchhuah mai mai a theih dawn tawh lo a, in luahtute chhuahtir dawn chuan, thla thum chhung in luah man pek loh vang te, in luahtuin ama thua mi dang a luah chhawntir (sub-let) vang te, in luahtuin a tira an luah dân leh inbiakremna anga an awm loh vangte a ni a ngai dawn a ni.