CM hoin Chapchar Kût hman dan thlirlêt

Chief minister Lal Thanhawla hoin April 28, Zirtawpni khan Chapchar Kût 2017 Organizing Committee member-te CMO Conference Hall-ah an ṭhu a, kumina Chapchar Kût hman dan an thlirlet. CM chuan, thupui neia Chapchar Kût hman chu ṭha a tih thu a sawi.

CM Lal Thanhawla chuan, ṭhangthar leh ṭhalaiten Mizo pipute kût pui ber, Chapchar Kût an hlut zel chu lawmawm a tih thu sawiin, "Hmun hrang hranga awm Zo hnahthlakte pawhin Chapchar Kût an hmang ṭhin hi thil chhenfâkawm tak a ni a, Thupui neia Chapchar Kût hman hi a ṭha hle a ni," a ti.

Chapchar Kut Or­ganizing Committee secretary Lalhmachhuana, Central YMA general secretary-in report a pe a, Chapchar Kût hman dan tlangpui a sawi.

Meeting-a an sawi lan zingah, khualzin hîp nan Chapchar Kut chu ni tuk sa (fix date) neih chungchang te, thupui neia hman ṭha an tih thu te, kawngpuiah lirtheite ṭha leh mumal zawka an tlan theih nan Chapchar Kut ni chu no vehicle zone atan puan a ṭhat leh ṭhat loh thu te, Tourism department-in festival an hman ṭhin nena kaihkawpa kût pakhat ropui tak hman chungchangte a tel.