BJP seat pek zata lungawi tur party-in Sorkarna an siam dawn lo - Zodintluanga
Minister Zodintluanga, Congress Legislature Party (CLP) treasurer ni bawk chuan, MNF party chu inthlan leh hunah BJP-in seat an pek zata lungawi mai tur an nia sawiin, "BJP seat pek zata lungawi mai mai tur party-in sorkarna an siam dawn lo," a ti.
Zodintluanga hian Inrinni khan Siaha Meisatlah-a vantlang inkhawmah thu sawiin, "Mizoram BJP President-in BJP chu MNF-in BJP thawhpui an duh chuan BJP seat pek zatah an lungawi tur a ni a tih kha MNF chuan tun thlengin an la chhang ngam lo," a ti a; BJP seat pek zata lungawi tur party tan kum 2018 inthlana sorkar an tum thu lo sawi ve chu thil zahthlak niin a sawi.
May 4, 2017-a Mara Autonomous District Council (MADC) inthlannaah MNF-in seat 25 awmah seat 12 chauh an chuh ngam nia sawii Zodintluanga chuan, Congress party chu sorkarna chang tur chiang sa niin a sawi a, "Congress party-in hma kan sawn zel a, kan hotute rintlak vang a ni," a ti.
Zodintluanga chuan, Siaha district chhunga hmasawnna lian tham awmte chu Congress sorkar laia thawh deuh vek nia sawiin, "MNF kum 10 an sorkar chhunga an hnathawh kha Siaha district-ah zawng ila, hmuh tur a váng hle ang," a ti a; Siahaah hmasawnna lian tham sawi tur tam tak a thleng mek niin a sawi bawk.