Larsap leh Salvation Army hotu inkâwm

Salvation Army India Eastern Territory kum za tlin lawmna hmanpui tura lo kal Gen. Andre Cox leh a nupui Com. Sylvia Cox-te chu April 28, 2017 tlai khan Raj Bhavan-ah Governot Lt. Gen. Nirbhay Sharma nen an inkâwm.

Governor chuan, Salvation Army-te hnathawh chu ropui a tih thu sawiin, "Mizoramah pawh Salvation Army-te hian hmalakna hrang hrang an nei a, mipui tana an rawngbawlna a fakawm hle. Mizote'n khawtlang nun nghet tak, boruak, sik leh sá duhthusam nei mah se, nunphung ṭha lo - zu, vaihlo leh ruihlote do tur leh siamṭha turin Salvation Army-te hnathawh a pawimawh hle a ni," a ti.

Andre Cox chuan, Mizoram sorkarin a lo mikhual leh enkawl danah an lawm tih a sawiin, "Mipuite rawngbawl tura din Salvation Army hi engtik lai pawhin mipuite tana sorkar hmalaknaah ṭanpui turin an inring reng a ni. Hmasawn chak takin mihringte a tibuai hle a, engthâwl leh hahdamna hun an nei mang tawh lo a, chutiang karah Mizoramah chuan Pathianni tûkah thil dang zawng zawng châwlin, Pathian biakna hun ṭha leh hahdamna mipuiin an nei thei hi a entawntlak hle," a ti.

Salvation Army Gene­ral-te nupa hi India Eastern Territory-a territorial com­mander Com. Lal­ngaihawmi, territorial commander (designate) Com. Lalzamlova ten an ṭawiawm a ni.