MNF hnathawh chhunzawm lo-ah Congress sorkar puh

MNF vice president Dr R Lalthangliana chuan, May 4, 2017-a Mara Auto­­nomous District Council (MADC) inthlan turah MDF leh MNF-te thawhhona boruak a ni tèlin a sang zel nia sawiin, Congress sorkar chu MADC chhunga MNF sorkar hnathawh chhunzawm lo-ah a puh.

April 29, Inrinnia Tuipanga vantlang inkhawmah thu sawiin, Dr R Lalthangliana chuan, MADC chhungah MNF sorkar laia thingtlang khaw inkalpawhna khaw hrang hranga laih tlang tawhte chu Congress sorkar chhungin chhun­zawm a awm lo niin a sawi a, "MNF ministry hun laia Tuipang Hydel Project hawn tawh kha vawiin thlengin Congress sorkar hian a la function tir thei lo," a ti.

R Lalthangliana chuan, MADC hnuaia sorkar hnathawkte'n thla thum/li velte hlawh an la thei lo fo mai nia sawiin, "Congress sorkarin a ngaihna a hriat loh vang te, an thatchhiat leh inthlahdah lutuk vang a ni," a ti. MADC huam chhunga zirna in tlabal tak takte ṭha taka siam turin MADC-ah MDF leh MNF an sorkar ngei a ngai niin a sawi bawk.