Tuichawngah sikserh vei 127 hmu

June 26, Ningani khan Lunglei chief medical officer Dr Thani Pachuau hoin Health department-a thawkte chuan Centre for Peace and Development nen ṭang dunin Lunglei district-a sikserh tamna khua, Tuichawngah endik rûnpui an buatsaih a, sikserh vei mi 127 an hmu chhuak.

Lunglei CMO chuan, Tuichawng mipui chu sikserh tam hun a thlen mek avangin thosi lèn zár ṭha tur leh an in leh a vêla thosi pian theihna hmunte tifai ṭhin turin a chah.

Medical team hian thisen an endik bakah, in tinah thosi hlo (DDT) an kâp a, thosi lên an pe vek bawk. Thisen test hi a thlâwna tih a ni a, damdawi leh enkawlnate pawh a thlâwn veka tihsak an ni.

Tuichawngah hian mi 2,500 vel awmin, mi 2,244-te thisen endik a ni a; sikserh vei hmuh chhuah mi 127-te chu malaria PF 118 leh PV pakua an ni.