Aizawla flyover siam turin Thawhhona thuthlung ziah a ni

Aizawl khawpuia Bawng­kawn leh Vaivakawna flyover siam tuma ruahmanna kal mekah nimin khan chief minister Zoramthanga kaihhruaina hnuaiah Mizoram sorkar leh Telecommunications Con­sultants India Ltd. (TCIL) ten thawhhona thuthlung (memorandum of understan­ding) an ziak.

CM Zoramthanga chuan, memorandum of understanding (MoU) ziah a ni tur chu lawmawm a tih thu sawiin, "DPR leh funding system-ah a hlawhtlinna kan hmuh vat kan beisei. Mizoram sorkar leh TCIL-in theihtawp an chhuah tlàn phawt chuan flyover siam tum hi a hlawhtlin ngei ka ring," a ti.

Vanglaini palai zawhna chhangin Chief Minister chuan, "Flyover atan hian mimal in vel lâk ngai awm mah se, zangnadawmna hmanga chinfel tur a ni," a ti a, harsatna awm loa an chinfel theih ngei an inbeisei thu a sawi.

MoU ziahtur sawifiahtu PWD engineer-in-chief Bowman-a chuan, Bawngkawn leh Vaiva­kawna kawng chhâwng siam turin feasibility report thehluh a ni tawh a, sorkar laipuiin a pawm tawh thu a sawi a, "TCIL hian rei lo têah DPR peih an tum. DPR hi TCIL-in sorkar laipuiah an ûm zui ang a, an hlawhtlin chuan hna pawh anmahni tih vek tur a ni. Mizoram sorkar tan sum leh pai sèn ngai a awm dawn lo. A hlawhtlin loh pawhin Mizoram sorkar tan chàwi tur a awm lo," a ti.

PWD E-in-C sawi danin, TCIL hian DPR-ah an hlawh tur an siam tel ang a, an hlawhtlin chuan chu chu an chang thei dawn a ni. An hlawhchham a nih chuan, an bawhzuina atana an senso zawng zawng chu an séng thlâwn dawn tihna a ni thung.