MNF demna leh sêlna in hriatin Zâm reng reng suh u - MNF President

MNF party chuan nimin khan Mizo Hnam Rûnah an party zawm thar lawm luh inkhawm an buatsaih a; MNF president Zoramthanga chuan, an party mite chu miin MNF an demna leh sêlna an hriat avanga zâm lo turin a chah. MNF President hian ZONET Cable TV news editor J Malsawmzuala Vanchhawng chu an party-ah a lawm lut a ni.

MNF vice president Vanlalzawma kaihhruai inkhawmah Zoramthanga chuan, "Miin MNF an demna leh sawiselna in hriat hian zâm reng reng suh u. Kum 60 chhung Pathianin harsatna a sutkiansak tawh hi kawng chanveah min kalsan lo ang. Ṭhenkhatin kalphung tharte an ti a, kalphung thar an nei zing a, an nei reng. Pathianin tui anga nghet lo a duh lo," a ti a, MNF chu nghet takin an ding niin a sawi.

Zoramthanga chuan, Congress party chu beih tham an awm tawh lo nia sawiin, "Beih lutuk chi pawh an ni lo, an moral a down ang. MNF aṭanga chhuakte chu an che fuh ngai lo. Hnam thuthlung kengtu kan nih tlat avang hian seng khawm hna kan thawk mek a ni," a ti.

MNF president Zoramthanga chuan, Mizoram sorkar chu kohhran hruaitu tak takte pawhin leiba an ngah lutuk tia an sawi thu tarlangin, "An hre chiang lo a ni. India hmarchhakah leiba nei tlem pathum zingah kan tel. ADB aṭanga cheng vbc. 1,000 pûk kan tumah pawh vbc. 720 chu Aizawl min bomb saktute rulh tur a ni," a ti a; ADB loan pûk sorkar laipuiin a rulhsak dan turte chu a sawiseltute'n an hre lo niin a sawi.

MNF zawmtu J Malsawmzuala Vanchhawng chuan, a naupan lai aṭanga zalenna sualtute ngaisangtu a nih thu sawiin, "Kan chhehvela hnam tam tak chîmrala awm mekte leh chîmral tawhte ka thlirin, zalenna sual ngam hnam kan ni hi ka inchhuang. Mite'n sawi hnâwm leh sawi têt tum mah se, zalenna sual ngam hi a tê thei lo," a ti a; kum 2023-a inthlanpuiah MNF tan tualṭo party dang beih tham an awm a rin loh thu a sawi bawk.