Social media hmanah fimkhur turin Home Minister-in police-te a chah

Mizoram Police-in kum 50-na, an lawmna kal zelah Home minister Lalchamliana chuan nimin khan Police Head­quarters (PHQ) Multi­purpose Hall-ah Mizoram Police 50th Anniversary disc a sem. Minister chuan, police-te chu social media hman kawngah fimkhur lehzual turin a chah.

Lalchamliana chuan, police-te chu invawng uluk tur leh inthununna ṭha taka vawng tura chahin, "Taksa hrisel leh fit taka awm reng tur in ni a, mipui rawngbawl­saka venghimtu in nihna kawngah in mawh­phurhna pawi­mawh­zia hre thar zelin, social media hman kawngah pawh fimkhur lehzual ang che u," a ti.

Kum 50 chhungin Mizoram police-in hmasawnna nasa tak a neih thu sawiin Lalchamliana chuan, "Mizo mipui veng­hima thlamuantu an ni ṭhin hi a hlu hle a ni," a ti a; mipuite'n innghah nan leh thlamuantu atan an rin zel theih nan tunlai thiamna leh boruak mila inzir taima turin a chah.

Home Minister chuan, Covid-19 léng vanga sorkarin inrenchemna (austerity measure) a kalpui avangin police tih­chakna tur leh tih­hmasawnna tura rua­hmanna awm sa leh phalna hmuh vek tawh­te duh anga chakin tihhlawh­tlin theih a ni rih lo tih a sawi bawk.

Director general of police Devesh Chandra Srivastava pawhin thu sawiin, sorkarin mawh­phurhna a pekte ṭha taka theihtawp chhuaha an hlen ṭhin avangin Mizoram police chu chhuan­awm a tih thu a sawi.

Mizoram Police 50th Anniversary disc hi Mizoram police mi leh sate zawng zawng hnena sem tur a ni a, a hmahruai atan PHQ hnuaia unit hrang hrang aiawhte hnenah sem a ni. Semna inkhawmah hian police hotu liante an tel a ni.