Darlak leh Bawngva khuaah Cold storage dah a ni dawn

Mamit viltu Central Prabhari Officer (CPO) for Aspirational District Umakant chuan nimin khan Mamit district-a Dárlâk leh Bâwngvâ khua bakah, Mamita sorkar laipui leh Mizoram sorkar aṭanga hna thawh hrang hrang a tlawh a; Darlak leh Bawngvaah thlai thar dahṭhatna tur cold storage ngaihtuah a nih dawn thu a sawi.

Umakant chuan, Dárlâk leh Bâwngvâ khaw mipui chàwi kân nan core committee din ṭha a tih thu a sawi a, "Dárlâk leh Bâwngvâ mipuite'n an buh leh bâl tharte deh chhuah leh tihpun bakah, ṭha taka vawn reng a nih theih nan a dah ṭhatna tur cold storage ngaihtuahsak a ni dawn. Kan district hi district hmasawn ber a nih theih nan thawhhona ṭha a pawimawh," a ti.

Nimin vêk khan Dárlâk leh Bâwngvâ khuaah Core Development Committee din a ni a, committee hian hmasawnna kawnga entawn tlâk ni tura ruahmanna siam leh hmalak dan tur an duang ang a, thla khatah vawi khat tal an ṭhukhawm ṭhin dawn a ni.

Umakant hian Dárlâk leh Bâwngvâ khuaa anganwadi centre, farm pond leh Mamita Block resource Centre, Mamit College leh District Hospital-te a tlawh a; harsatna an neihte sutkianpui turin an lo ngen a ni.