Hripui laka fimkhur turin mipui chah
Mizoram sorkara Covid-19 thupuangtu Dr Pachuau Lalmalsawma chuan thuchhuah siamin, hmarchhak state hrang hranga Covid-19 vei mek zinga 30.53% chu Mizorama mi an nih thu a tarlang a, hripui laka fimkhur turin mipui a chah.
Dr Pachuau Lalmalsawma chuan, khawvel, India leh hmarchhak state dinhmun thlirin Covid-19 vei awm tawh mang lote pawhin an nei thar leh hlawm tih a tarlang a, "Hmarchhak state hrang hranga hri vei mek awm zat belh khawm aṭanga chhûtin Mizorama vei mek zat chu 30.53% a ni," a ti a; Mizorama Covid-19 vei mek zinga ṭhenkhat chu in lama na tak tak leh damdawi-ina awmte an nih thu a sawi.
Natna lan chhuah hnu pawha an nat viau hma chu endik duh lo leh endik hnua tlai tawh vanga thi an awm nia sawiin Dr Lalmalsawma chuan, "Natna lan chhuah ṭan tirh emaw, inrinhlelh veleh emawa test vat a ṭul," a ti a; mask vuah uluk, kut silfai ṭhat leh mi dang hlata awmte uar thar leh turin mipui a chah a ni.