Champhai dist-a NH siamnaa leivûng paih vangin harsatna lian thleng loah ngai

Champhai District Monitoring Committee chuan nimin khan an chairman James Lalrinchhana, district bawrhsap hoin National Highway no. 6 kawngpui siam meka leivûng paih dan an endik a; harsatna lian tham thleng a awm lo niin an tarlang.

Kawng siam endik hi Champhai leh Khawzawl district inrìna Khawchhak Tuipuiah an ṭan a, NHIDCL leh an hnuaia contractor Shri Balaji Construction Ltd. hmalaknain leilung, thing leh mau bakah, nungchate chennaah nghawng ṭha lo a thlen thei em tih an enfiah. Leivûng paihna tura siam spoil bank leh muck dumping site-te leh leivung paihna tura ruat ni loah paih a nih dante endik a ni a, a tlangpuiin harsatna lian tham a thleng rih lo niin an tarlang a ni.

Saikah luiin Tuipui a finnaa leivûng tawlhin harsatna a thlente a ṭul anga bawhzui turin company hotute an hriattir a; leivûng tawlh tur danna gabion wall leh check dam siamte enfiahin, siam belh ṭul leh mamawhte company hotute bawhzui turin an hriattir bawk a ni.

Monitoring Committee chuan, NHIDCL aiawhte leh an hnuaia contractor-te chu environment tichhe lo záwnga hna tlo leh ṭha siam tum turin an chah a; hmalakna bul ṭan hmain environment clearance neih hmasak a ṭul thu leh kawng laihnaa thing kih thlûk aiawh tur thing tam zawk phun turin an hriattir bawk.

Khawzawl leh Champhai inkara NH-6 kawngpui siam tur chu km. 26.78-a thui a ni a, leivûng paihna tur bik hmun 35 ruat a ni.