MPYCC-in ramri véngtute tui an pe

Congress party ṭhalaite chuan Mizoram leh Assam ramri bul, Vairengte Aitlang, Sabual zaua awm mek Mizo IR police-te chu nimin khan an tlawh a, tui thianghlim (mineral water) báwm 30, chhang leh tui tihthianghlimna (water filter)-te an pe.

MPYCC chuan, Vanglaini chanchinbu, July 4, 2022-a chhuakah Aitlang, Sabual zaua Mizo IR duty-te tui in tur an thlitfim dan thlalak tarlan a ni tih sawiin, chumi bawhzui chuan IR police-te an tlawh tih an tarlang.

MPYCC vice president Laltawnliana chuan, IR duty-te chu Congress ṭhalaite'n an ngaihsak tih lantir an duh thu sawiin, "Thil ropui leh tam tak rawn thlen thei lo mah ila, kan ram tana pasalṭha ram múte kan hre reng che u tih kan rawn lantir a, kan phâk tâwk chinah kan rawn ngaihsak che u a, harsatna in tâwk a nih pawhin theihtawp kan rawn chhuah ve zel dawn a ni," a ti a; sorkar sawisel emaw, tu emaw dem tura kal an ni lo tih a sawi.

IR police-te chuan, harsatna lian tham an nei lo tih sawiin, tui in tur an thlitfim dan chu Chhattisgarh lamah pawh an tih ṭhin dan a nih an sawi a; tun dinhmunah boruak a muanawm thu an sawi bawk.

MPYCC tarlan danin, Vairengte Aitlang lamah Mizoram police camp pathum a awm a, Congress ṭhalaite'n an tlawh Sabual zauah hian IR police 15 an in duty chhâwk ṭhin a, ni 15 danah an inthlak ṭhin a ni.