Khaw danga thawk zirtirtute tan quarters sak a ṭul tak zet - Duhoma
ZPM leader Lalduhoma chuan, zirna in (building) chhe lutuk te, zirtirtu leh non-teaching staff indaih lohnain zirlaiteah nghawng ṭha lo a neih ṭhin thu leh khaw danga zirtirtu hna thawkte'n an thawhna sikul ṭha taka an awp theih nan quarters sak a ṭul tak zet thu a sawi.
Nimina Serchhip MZP-in an khuaa HSLC leh HSSLC pass ṭhate Serchhip Auditorium-a an lawmpuinaah thu sawiin Lalduhoma chuan, ram changkangin an ngaih pawimawh chu zirna leh hriselna a ni a, chumi atan chuan sorkar pawhin pawisa a dah tam a, hma a la nasa ṭhin tih a sawi a, "Zirna in chhe lutuk te, zirtirtu leh non-teaching staff indaih lohnain zirlaiteah nghawng ṭha lo a nei ṭhin," a ti.
Lalduhoma chuan, Mizoramah chuan sorkar sikula thawk zirtirtute'n an fate an thawhna sikulah an kaltir duh lo tih sawiin, "Sorkar enkawl sikul apiang a ṭha lo a, zirlai mamawh thil pawh a inchhawp nêp zawk zel emaw tih tura a awm hi a pawi tak zet a ni," a ti a; a bial chhungah pawh zirtirtute hlawh VC-te'n an thawh khawm ṭhinna sikul a awm thu a sawi.
ZPM leader Lalduhoma chuan, zirtirtute an thawhna khuaah an awm ṭhat a ṭul thu sawiin, "Khaw danga zirtirtu hna thawkte'n an thawhna sikul ṭha taka an awp theih nan quarters sak a ṭul em em a ni," a ti a; ṭawng thiam tâwk lohnain zirlaite hma a sawntir lo ṭhin tih sawiin, "Science leh Maths-te pawh zirlaite'n chiang taka an hriat thiam theihna turin kan ṭawnga kan inzirtir a ṭul hle a ni," a ti.
Lalduhoma chuan, zirlaite chu eirukna laka filhlim tur leh do tlat tura fuihin, "In nu leh pate kha bûk tling loa suma hlâwkna rawn hawn ṭhin pawh an ni thei, chutiang an nih chuan, nu leh pate pawh ni se, do tlat turin ka duh che u a ni," a ti a; eirukna leh kut tling loa sum lak luh chu ramin a chhiatpui nasat thu a sawi.
Serchhip bialtu MLA hian zirlai ti ṭhate chu a lawmpui thu sawiin, an kal zelna turah duhsakna a hlan a ni.