KHAWTHLIR

Online-in electric Bill pek theih
Power & Electricity department chuan, online hmangin electric bill pek theih a ni leh tawh tih an tarlang. PE department chuan, system thar hman a nih tawh avangin consumer number thar hmangin electric bill pek tawh tur a nih thu sawiin, consumer number thar chu number pariat (8 digits) hlang a nih thu an tarlang bawk.

Tlar khata intlar tur
Aizawl Traffic SP Rodingliana Chawngthu chuan thupek chhuahin, Aizawl leh a chhehvela filling station/petrol pump-a petrol/diesel la tur lirtheite chu kawngpui dungah tlar khat (single line) chauha intlar/ding turin a hriattir a; thupek zâwm lote chu MV Act hmanga hrem theih an nih thu a tarlang.

Rakzu man
Khawzawl Police chuan nimin khan Romuana (45) s/o Taimanga, Khawzawl Arro Veng hnen aṭangin rakzu litres 80 an man. Zu hi Rs 16,000 man a ni a, Hmingmawibera (37) s/o C Vankunga, Khawzawl Zaingen Veng taxi aṭangin an man a ni.

Kolasib-ah ruihhlo do dan tur sawiho
District 272-a ruihhlo do beihpui thlâkna, Nisha Mukt Bharat Campaign kalpui dan turah nimin khan Kolasib District Nasha Mukt Bharat Campaign chu an chairman John LT Sanga, bawrhsap kaihhruaiin an ṭhukhawm a; zirna-in leh kohhran hrang hrang inkhawm kaltlangin ruihhlo dona kalpui an rêl. Lungdai, Kawnpui, Hortoki, Seṭhawn, Thingdawl, Kolasib leh Bairabi-ah ruihhlo vanga ṭanpui ngai inziak lut mi 704 an awm a, Vairengte, Bilkhawthlir, N Chhimluang, Saiphai leh Saipumah ruihhlo ngai mi 405 enkawl mek a ni.

Pisa thar hawng
Champhai NABARD district development manager H Lalhmachhuani chuan July 4, Thawhṭanni khan Kelkang Multipurpose Cooperative Society Ltd. hnuaia Primary Agriculture Credit Cooperative Society (PACS) pisa thar a hawng. Kelkang Multipurpose Cooperative Society hi kum 2015-ah hawn niin, member 70 an awm a, pisa hawnnah hian PACS hnuaia account hawng thar mi 42 hnenah passbook sem a ni.