NHM hnuaia thawkte hlawh hrêng khawtlai lo turin Mizoram sorkar chah

ZPM Ṭhalai chuan, Mizorama National Health Mission (NHM) hnuaia thawkte'n hun rei tak hlawh an la thei lo ṭhin chu pawi an tih thu sawiin, hlawh hréng khawtlai tawh lo turin Mizoram sorkar an chah.

ZPM ṭhalaite chuan thuchhuah siamin, "NH hnuaia thawkte hlawh, sorkar laipuiin 90% zet a tum tawh hnuah pawh Mizoram sorkarin a tum ve tur 10% a pek chhuah ve duh mai loh ṭhin avanga NHM hnuaia thawktu doctor, nurse, technician leh staff dangte hun rei tak chhung hlawh la thei loa an awm ṭhin hi pawi kan ti hle," an ti.

ZPM Ṭhalai chuan, "Kan ṭhenawm state-a NHM hnuaia thawktute'n hlawh lâk theih loh thu an sawi ve ngai loh laia Mizorama sawi tur a awm reng bik hi Health Minister mutthlûk der vangah kan ngai," an ti a; NHM hnuaia thawkte chu chief minister Zoramthanga, Finance minister ni bawk lakah Health Minister-in a chhan ngam lo a, an thlavâng a hauh ngam lo a nih chuan Health Minister ni tlâkah an ngai lo tih an sawi bawk.