Sikserh laka invênna zâwm turin chah

Lunglei DC Kulothungan A chuan nimin khan sikserh (malaria) laka invên dan tur a tichhuak a, zâwm ṭheuh turin district mipui a chah. Accredited social health activist (ASHA), health sub-centre leh PHC tinah sikserh damdawi a thlàwna lâk theih reng a nih thu a tarlang bawk.

Bawrhsap chuan, tunlaiin ruahtui a tam tih tarlangin, "Ruahtui tla avang hian tui tling tam tak a awm ṭhin. Tui tlingte hian malaria pâi thosi pian theihna a siam nasa a, malaria natna a darh vak lohna turin invenna turte kan zâwm ṭheuh tur a ni," a ti.

Lunglei Bawrhsap chuan, khawsik, lu ná, luakchhuak, tlun, taksa ná neihte chu ASHA/sub-centre/PHC-ah thisen endiktir vat turin a chah a, sikserh veite chu damdawi ei dan tur dik takin kim taka ei turin a chah bawk.