April 26 hnua hripui hmuh tam ber ní

July 4, Thawhṭanni khan Mizoramah Covid-19 vei mi 138 hmuh chhuah a ni a, kumin April 26 hnua hmuh chhuah tam ber ní a ni. Nimin khan hripui vei dam tawh mi 30 chhuahtir an ni a, Covid-19 vanga thi an awm lo.

Thawhṭannia Covid-19 positive hmuh hmuh thar mi 138-te chu mipa 62 leh hmeichhia 76 an ni a; ZMC RT-PCR laboratory-a hmuh mi pakhat leh RAT hmanga hmuh mi 137 niin, positivity rate 23.19% a ni.

July 4-a hripui vei hmuh chhuah zat, mi 138 chu April 26, 2022 hnua hmuh chhuah tam ber ni a ni a, kumin April 26 khan mi 164 hmuh chhuah a ni. Mi 138 zinga 14 chu Rawpuichhip khaw mi an ni.

IDSP record angin, Mizoramah Covid-19 vei 2,29,348 hmuh chhuah a ni tawh a, mipa 1,06,759 leh hmeichhia 1,22,589 an ni a, mipa aiin hmeichhia 15,830-in an tam zawk. Nimin tlai dar 5 thleng khan mi 2,28,304 (99.54%) chhuahtir an ni tawh a, mi 706 (0.31%) thi tawhin, enkawl mek mi 338 (0.15%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna pahnih chauh a awm leh tawh a, chu'ngte chu Siaha district leh Champhai district a ni. Positive active case tamna ber Aizawl district-ah pung zelin, mi 193 an awm tling leh tawh a, Lunglei district-ah mi 53 leh Serchhip district-ah mi 43 an awm bawk.