Siahaah ASF laka invên dan tur sawiho

Siaha District Committee for Prevention, Control and containment of African Swine Fever chuan nimin khan an chairman Lalsangliana, district bawrhsap kaihhruaiin ASF laka invên dan tur an sawiho. April-December, 2021 chhungin Siaha district-ah ASF vangin cheng nuai 72.52 hû vawk a thih thu tarlan a ni.

Ṭhutkhawma tarlan danin, April-December 2021 chhung khan Siaha district-ah ASF vei vawk 274 a thi a, vawk 146 suat a ni bawk. Vawk thi leh suatte chu khaw pangaa chhungkaw 163-te vulh a ni a, vawk thi leh suatte chu a vaiin cheng nuai 72.52 hû a tling.

Tun dinhmunah Siaha district-ah ASF vei hmuh a la ni lo. Meeting chuan, ASF laka him nan July 11, 2022 aṭangin district dang bakah khua leh khua inkara vawk lâk luh khapna thupek chhuah a rél. Police, Vety department leh mipui ṭanho dan tur kawng dap chungchang bakah, VC tin hnenah tih tur leh tih loh tur te, AH&Vety an puih theih dan tur inhrilhfiahna thuziak siam te, ASF vei vawk suat leh phûm dan tur leh bio-security/sanitationery measure inzirtirna tam zawk neih dan turte an sawiho a ni.