VIP light vuah phal a ni tawh lo
Sorkar laipuia Cabinet-in India ramah mi pawimawh bik (VIP)-te lirtheia VIP light (beacon light) vuah ṭhin chu May 1, 2017 aṭanga tihtawp tura thutlukna a siam chu hman ṭan a ni a, Mizorama VIP-te pawhin an zawm ve tawh tlangpui. Hetih lai hian, hemi chungchangah hian Mizoram sorkarin a hranpain hriattirna (order/notification) a chhuah lo.
Hriat theih chinah, May 1 hmain Mizoram sorkara hotu lian, governor Lt.Gen. Nirbhay Sharma, chief minister Lal Thanhawla, minister, parliamentary secretary, MLA, chief secretary Lalmalsawma, Aizawl Municipal Corporation mayor PC Lalhmingthanga leh deputy mayor Lalringliana leh sorkar officer-te'n an official car-a VIP light an hlîp tawh a; VIP light vuah ṭhinte'n an hlih vek tawh leh hlih vek loh erawh hriat theih a ni rih lo.
Chief secretary Lalmalsawma chuan Vanglaini palai zawhna chhangin, VIP light vuah phal tawh loh chungchangah sorkar laipui aṭangin hriattirna an la dawn loh thu a sawi a; chutih rualin, VIP light vuah phal tawh loh chungchangah Mizoramah a hranpain hriattirna chhuah a ngai lo tih a sawi.
Lalmalsawma chuan, Motor Vehicle Rules chu tun hmain mahni state chhung bik atan state sorkar thuneihna awm ve mah se, tunah chuan sorkar laipuiin thuneihna a neih vek tawh thu a sawi a; VIP light chungchanga sorkar laipui thu chu Mizoramah pawh a hranpaa hriattirna chhuah loin zawm ve mai tur a nih thu a sawi bawk.