Kum 2016 chhungin Mizoram hmar lamah thubuai 2,305 ziah luh a ni

Mizoram police-a DIG (Northern Range) huam chhungah kum 2016 chhung (January-December) khan thubuai 2,305 ziah luh a ni a, chu'ng zinga thubuai 22 chu tualthah thubuai niin, 15 chu pawngsual thubuai a ni.

DIG (NR) hnuaiah hian district panga - Aizawl, Champhai, Kolasib, Serchhip leh Mamit district-te a awm. Tun hnaia DIG (NR) crime review meeting-ah tarlan danin, January 1 - December 31, 2016 chhunga thubuai ziah luh 2,305 zingah Aizawla ziah luh a tam ber a, thubuai 1,383 ziah luh a ni. Champhai district-ah thubuai 250, Kolasib district-ah 366, Serchhip district-ah 154 leh Mamit district-ah 152 ziah luh a ni.

Kum 2016 chhunga thubuai ziah luh zinga 1,951 chu Indian Penal Code hnuaia ziah luh a ni a, a bak 354 chu dan dang hnuaia ziah luh a ni.

Tuyalthah thubuai 22 ziah luh a ni a; chu'ngte chu Aizawl district-ah 14, Champhai leh Kolasib district-ah pathum ve ve, Serchhip district leh Mamit district-ah pakhat ve ve a ni. Tualthah tum thubuai 14 ziah luh a ni a, mi suam thubuai panga(Aizawl district-ah pali leh Kolasib district-ah pakhat) a awm a; mi rûkbo (kidnapping & abduction) thubuai panga (Aizawl district-ah pathum leh Kolasib district-ah pahnih) a awm.

Pawngsual thubuai 15 a awm a; chungte chu Aizawl leh Kolasib district-ah panga ve ve, Champhai leh Serchhip district-ah pahnih ve ve leh, Mamit district-ah pakhat a ni. POCSO Act hnuaiah thubuai 148, Immoral Traffic Act hnuaiah pahnih, JJ Act hnuaiah 11, Foreigners Act hnuaiah pathum, IT Act hnuaiah pakhat, NDPAS Act hnuaiah 63, MLPC Act hnuaiah 101 ziah luh a nih bawk.