Scholarship tur pe chhuak tawh

Mizoram Scholarship Board (MSB) hotute chuan, Post Matric Tribal Scholarship dawng tura thlan zingah bank account felfai taka neiteah chuan pawisa thun turin an pek chhuah vek tawh thu an sawi.

Vanglaini palai zawh­na chhanga MSB hotute sawi danin, bank account felfai tawhte pawisa tur chu pek chhuah vek ni tawh mah se, bank lamin zirlaite account-a la thun loh pawh an la nei thei a ni. Hetih lai hian, bank account felfai tak neite pawh account number leh IFSC dik tawk loa MSB-ah thehluh a awm a, chungte chu thunsak an la ni lo.

Sorkar laipui thupek angin, Post Matric Tribal Scholarship dawng turte hian bank account an neih vek a ngai tawh a, chutih rualin, zirlai zingah bank account inṭâwmte an awm a, chu'ngte chuan anmahnia account an neih phawt a ngai a ni.

Bank account felfai thlap, an account-a pawi­sa la lut lo an awm pawhin tun dinhmunah chuan complaint theih a la ni lo a, complaint theih loh chhan chu - pawisa pek chhuah tawh si, bank lamin an account lama an la thun luh si loh a awm theih vang a ni. Complaint hun chu May 8-16, 2017 chhung hawn a ni ang.