Political party-te'n Aizawl FC an lawmpui
Mizorama political party hrang hrang - Congress, MNF, MPC leh ZNP-te chuan India rama football-a inelna sáng ber, I-League-a Aizawl Football Club an champion chu an lawmpui thu an tarlang.
Congress party thuchhuah chuan, India hmarchhak biala a hmasa ber atana Aizawl FC-in I-League nomawi a chawi chu lawmawm an tih thu an tarlang a, "AFC player, coaching staff leh club neitute kan lawmpui tak zet a ni," a ti.
Congress party chuan, "Chief minister Lal Thanhawla leh Sports minister Zodintluanga ten Rajiv Gandhi Stadium, Lammual leh district headquarters hrang hranga inkhelhna ṭha zawk an siamte hi Mizo ṭhalaite'n football-ah nasa taka hma kan sawnna niin kan ngai," an ti a; Aizawl FC neitu Robert Romawia Royte, Mizoram Football Association, Mizoram Premier League buatsaihtute chungah lawmthu an sawi bawk.
MNF thuchhuah pawhin, I-League-a Aizawl FC an champion chu an lawmpui thu leh an kal zelna turah duhsakna an hlan thu a tarlang. Nimina Mizo Hnam Runa inkhawmah MNF senior vice president Tawnluia chuan, "I-League-a Aizawl FC an champion ta hi lawmawm kan ti em em a, Mizoram an chawimawi a, Mizo mipui khawvel hriata min phochhuaktu leh min tihming-ṭhatu an ni," a ti.
Tawnluia chuan, Aizawl FC chu an kal leh zelna turah duhsakna a hlan a; Aizawl FC neitu Robert Romawia Royte chu fakawm a tih thu leh chawimawi a phû an tih thu a sawi bawk.
MPC party thuchhuah chuan, "India rama football inelna sang ber I-League-ah Aizawl FC an champion thei hi ropui kan tiin lawmawm kan ti tak zet a. Aizawl FC hruaitute ṭhahnemngaihna leh player-te inpekna ropui kan ti a, an thawhrim rah Mizoramin kan seng ta a ni," a ti. Infiamna lama Mizoram hmasawnna chu media hrang hrang leh sport writer-te thawh rah nia an ngaih thu an sawi bawk.
ZNP president Lalduhoma chuan nimina an party pisaa thu a sawinaah, Aizawl FC champion a lawmpui thu a sawi a, “Football avanga Mizoram mai ni lo, khawvel hmun hrang hranga Zofate inpumkhatna chu chhawm nung zel ang u,” a ti a; I-Leaque-a tel pha Mizo tlangval 50 vel an awm avang leh infiamna lama ṭhahnemngai Sports minister Zodintluanga leh sorkar chungah lawmthu a sawi a ni.