Citizenship (Amendment) Bill hi a him lo - Lalduhoma

ZNP president Lalduhoma chuan, Citizenship (Amendment) Bill 2016 chu Mizo hnam tan a him lo niin a sawi a, "Citizenship (Amendment) Bill 2016 hi sakhaw behchhana khua leh tui nih theihna tur a nih avangin kan hnam tan a him lo thei dawn," a ti.

Nimina ZNP pisaa inkhawmah thu sawiin Lalduhoma chuan, “Citizenship (Amendment) Bill hi July 19, 2016-ah Parliament-ah pharh a ni a, winter session-a sawiho turin Joint Parliamentary Committee-in a buaipui mek a ni,” a ti a; Bill chu pass a nih chuan Afghanistan, Bangladesh leh Pakistan aṭanga Hindu, Sikh, Budhist, Jain, Parsi leh Kristian sakhaw betute chu India rama kum ruk an awm hnuah khua leh tui nihna pek theih an ni tawh dawn niin a sawi.

Lalduhoma chuan, Citizenship (Amend­ment) Bill chu sakhaw behchhana India khua leh tui nih theihna tur a ni tih sawiin, "India ram hi Hindu rama siam tumna ni berin a lang. Bill hian Assam Accord 1985 a kalh avangin AASU leh AGP-te pawhin na takin an dodal mek a; Mizoramah pawh Chakmate khua leh tui nihna pekna tur a nih avangin state dangte nena hma la hoa lungrual taka dodal tlang turin political party, tlawmngai pawl leh kohhrante ka sáwm a ni,” a ti.

ZNP President chuan, zirlaite'n a hun taka scholarship an dawng thei lo fo thu sawiin, tunah pawh a kim loa an dawn mek thu a sawi bawk.